ئێران دهستیگرتووه بهسهر 15 بیره نهوتی عیراقدا

دهستهی نهزاههی عێراق ئاشكرایكرد حكومهتی ئێران دهستیگرتووه بهسهر زیاتر له 15 بیره نهوتی عێراقدا و تائێستاش دزین و بهتاڵانبردنی نهوت له پارێزگای بهسرهوه بهردهوامه، تهئكیدیش لهوه دهكاتهوه كه وهزارهتی بهرگری گرێبهستی چهكی بێ كهڵك و خراپی لهگهڵ ئهمهریكا ئیمزا كردووه.
فهرهج موسا جێگری سهرۆكی دهستهی نهزاهه به رۆژنامهی حهیاتی راگهیاند: "عێراق بهڵگهنامهی تهواوی لهبهردهستدایه كه ئێران دهستیگرتووه بهسهر ئهو بیره نهوتانهدا لهڕێگای لێدانی بیر بهلاری بۆ ناو خاكی عێراق و بهزاندنی سنور بهتایبهت دوای دهركردنی ئهندازیار و كرێكاره عێراقییهكان".
فهرهج ئاماژهی بهوهشدا كه تائێستاش رۆژانهی له پارێزگای بهسرهوه نهوت دهدزرێت لهرێگای ئهو قاچاخچیانهی لهساڵی 1980 و 1991هوه له شهت ئهلعهرهبدا بڵاوبونهتهوه، وتیشی: "لهپارێزگای بهسرهدا زیاتر له ههزار بیره نهوت ههیه كه به 12 بۆری گواستنهوهوه بهستراون شهشیان نهوتی خاو و شهشهكهی تریان بهرههمهكانی نهوت دهگوازنهوه و سهرجهمیان تۆڕێك پێكدههێنن له ناوچهیهكی نزیك گرتوخانهی بوكادا و قاچاخچییهكان ئهو بۆریانه كوندهكهن و نهوتی لێدهدزن، تهكیدیشی كردهوه كه وهزارهتی نهوت تاوهكو ئێستا نازانێت بڕی ئهو نهوته چهنده كه دهنێردرێته دهرهوهی عێراق بههۆی نهبوونی ئامێری ژمێرهرهوه".
جێگری سهرۆكی دهستهی نهزاهه وتیشی: "لهڕێگای وێنهی ئاسمانییهوه ئهو ناوچانهمان دۆزیوهتهوه كه نهوتی لێوهئاودیو دهكرێت و هاوكات لیستێكمان لهناوی ئهو قاچاخچییانه دروست كردووه كه نهوت دزه پێدهكهن".
وتیشی: "لێكۆڵینهوهیهكی دوورودرێژمان داوهته سهرۆكایهتی ئهنجومهنی وهزیران لهو بارهیهوه".
لهلای خۆشییهوه حكومهتی تاران ئهو ههواڵانهی رهتكردهوه و تهئكیدی لهوه كردهوه كه ئهویش بههۆی دزینی نهوتی وڵاتهكهیهوه بۆ عێراق دهناڵێنێت، روونیشیكردهوه "دروستكردنی ئهم تۆمهتانه بۆ ئێران كه هاوكاته لهگهڵ سهردانه مێژوویهكهی ئهحمهدی نهژادی سهرۆكی ئێران بهمهبهستی تێكدان و شێواندنی ئهو سهردانهیه.

سهرچاوه: سایتی سبهی